ХИФУ-тааҕы научнай коллаборация дьиэтэ оҕолору босхо кууруска ыҥырар

ХИФУ-тааҕы научнай коллаборация дьиэтэ оҕолорго босхо эбии үөрэхтээһин кууруһун салгыырын туһунан үрдүк үөрэх пресс-киинэ иһитиннэрэр.

Куурус 14 естественнэй-научнай хайысхалаах бырагырааманан ыытыллар. Бырагыраама хайысхата — аныгы кэм үөрүйэхтэригэр сыһыарыы. Куурус чэрчитинэн үөрэнээччилэр бырайыак оҥоруохтара. Үөрэҕи ХИФУ уонна «Юные якутяне» өрөспүүбүлүкэтээҕи ресурснай киин үлэһиттэрэ ыытыахтара. Куурус бырайыактыыр хайысхалаах чааһа ХИФУ наукаҕа лабораториятыгар буолуоҕа. Бэлиэтээн эттэххэ, 9-11 кылаастарга алта бырагыраама иһигэр искусственнай интеллект кууруһа баар.

«Искусственнай интеллект идэҕэ барытыгар сыһыаннаах, онон  оҕо билиэхтээх. Биолог, юрист ИИ систиэмэтин улэтигэр туһаныахтаах. Куурус истээччилэрэ программированиены туһана үөрэниэхтэрэ»,- диэтэ Математика уонна информатика үнүстүтүүтүн алгебраҕа уонна геометрияҕа кафедратын чинчийээччи — доцена Эллэй Шамаев.

 Научнай коллаборация дьиэтин дириэктэрэ Прасковья Никифорова этэринэн, бүгүҥҥү күҥҥэ 90 сайабылыанньа киирбит. Кууруска сылдьыы туһунан сертификат ХИФУ — ка туттарсыыга эбии баал биэрэр, ордук үчүгэй көрдөрүүлээх оҕолор «Юные якутяне» киин сайыҥҥы лааҕырыгар киириэхтэрэ.

Үөрэх 2020 сыл балаҕан ыйын 14 күнүттэн, 2021 сыл ыам ыйын 31 күнүгэр диэри ыытыллыаҕа. Куурус салгыы Национальнай технологическай инициатива (НТИ) куруһуогун олимпиадаларыгар, научнай-чинчийэр куонкурустарга  уонна конференцияларга   кыттыан баҕалаахтарга аналлаах.