ХИФУ устудьуоннара бүтүн Россиятааҕы юриспруденция олимпиадатыгар миэстэлэстилэр

Хотугулуу-Илиҥҥи федеральнай үнүбэрсиэт юридическай салаатын устудьуоннара бүтүн Россиятааҕы юридическай олимпиада уокуруктааҕы түһүмэҕэр иккис уонна үһүс миэстэлэри ыллылар. Бу туһунан үрдүк үөрэх кыһатын пресс-сулууспата иһитиннэрэр.

Ол курдук, иккис сылын кыттар төрдүс куурус устудьуона Кристиан Куприянов «Конституционнай быраап» хайысхаҕа иккис миэстэни ылары ситистэ.

«Дистанционнай быһыы атмосфераны тириэрдибэт. Олимпиада диэн билиини тургутуу эрэ буолбатах, ону таһынан атын дьону кытта билсиһии, саҥа сирдэргэ, экскурсияларга сылдьыы, уопсай тэрээһин өйдөбүлүн ылыы. Сыл аайы ХИФУ аатыттан дьоһуннаахтык кытта сатыыбын. Ити, бука, бэйэтин оруолун оонньуур уонна үнүбэрсиэт рейтинигэр сабыдыаллыыр, үрдүк үөрэх кыһата үчүгэй исписэлиистэри бэлэмниирин дакаастабыла буолар», – диэн Кристиан Куприянов кэпсээтэ.

Оттон магистратураҕа бастакы сылын үөрэнэр Иван Кузьмин «Холуобунай быраап» хайысхаҕа үһүс миэстэни ылла.

«Олимпиадаларга кыттыы юрист идэтин кытта сибээстээх быраап соруктарын түргэнник уонна чуолкайдык быһаарсыы үөрүйэхтэрин сайыннарарга көмөлөһөр дии саныыбын», – диэн кини санаатын үллэһиннэ.

Олимпиадаҕа дистанционнай быһыылаах ааспыта бэлиэтэнэр.