ХИФУ устудьуоннара норуоттар икки ардыларынааҕа чинчийэр үлэ куонкурсугар бириистээх миэстэлэри ыллылар

ХИФУ физико-техническэй институтун төрдүс куурсун устудьуоннара Нижний Новгород куоракка норуоттар икки ардыларынааҕа техническэй уонна физико-математическай чинчийэр үлэ куонкурсугар бириистээх миэстэлэри ыллылар. Бу туһунан ХИФУ пресс-сулууспата иһитиннэрэр.

Үлэ практикатын кэмигэр суруйбут «Эрдэр бааллары чөлүгэр түһэрэн халынатааһын сүрүн балаһыанньалара» диэн ыстатыйатынан Алексей Федотов III степеннээх дипломунан наҕараадаланна.

«Мин чинчийэр үлэм бэлиэ өрүтүнэн, эрдэр бааллары бу ньыманы туһанан өрөмүөннээтэххэ кинилэр саҥа кэриэтэ уһун үйэлэнэллэр. Инникитин суудуналары тутуу эйгэтигэр үлэлиэхпин баҕарабын», – диэн Алексей Федотов эттэ.

«Салгыны сылытар хочуолу оҥоруу» диэн отчуоту бэлэмнээн Егор Ильинов дьүүллүүр сүбэ үрдүк сыанабылын ылла уонна норуоттар икки ардыларынааҕы куонкурус лаурета буолла.

«Үлэ практикатын кэмигэр күн аайы туох эмит саҥаны билэрим. Үөрэхпин бүтэрдэхпинэ бэйэм идэбинэн инженер-сварщик буолуом», – диир Егор Ильинов.

«Модельнай холобуру сыбааркалааһын процесстарын экспериментальнай чинчийии» диэн үлэтинэн Лев Потапов эмиэ лауреат үрдүк аатын ылла.

Ону тэҥэ, «Сыбаарка оҥоһугун тутулун сорҕотун муҥутуур туругун сылыктааһын» диэн отчуотунан Олег Румянцев норуоттар икки ардыларынааҕы куонкуруска иккис миэстэни ылары ситистэ.