ХИФУ устудьуоннара WorldSkills Kazan 2019 аан дойдутааҕы чөмпүйэнээккэ кытталлар

НВК САХА – WorldSkills Kazan 2019 диэн идэ маастарыстыбатын норуоттар икки ардыларынааҕы чөмпүйэнээтигэр кыттар Саха сирин сүүмэрдэммит хамаандатыгар Хотугулуу-Илиҥҥи федеральнай үнүбэрситиэт 11 устудьуона уонна бэрэстэбиитэллэрэ киирдилэр. Бу туһунан үрдүк үөрэх кыһатын пресс-сулууспата иһитиннэрдэ.

Атырдьах ыйын 23 күнүгэр FutureSkills диэн түһүлгэ үлэтин саҕалаата. Саха сирин сүүмэрдэммит хамаандата: минераллары оҥоруу, чочуйуу, реверсивнэй инжиниринг, квантовай технологиялар уо.д.а. хайысхаларга кыттар. Өрөспүүбүлүкэ чиэһин биэс кыттааччы, биэс эксперт уонна биир тим-лидер көмүскүүллэр.

Аан дойдутааҕы чөмпүйэнээккэ “Оҥорон таһаарыыга хамаанданан үлэ” диэн компетенцияҕа дойду национальнай сүүмэрдэммит хамаандатын тренерэ  ХИФУ “Future Skills:NEFU” норуоттар икки ардыларынааҕы киин дириэктэрэ Роман Гоголевбуолар. Кини эппитинэн, Саха сирин хамаандата ааспыт сыл күһүнүттэн эрчиллэн саҕалаабыт.

WorldSkills Kazan 2019 чөмпүйэнээт Казаҥҥа атырдьах ыйын 22 күнүттэн 27 күнүгэр диэри ыытыллар. 63 дойдуттан 1300 кэриҥэ кыттааччы 56 көрүҥҥэ күрэхтэһэллэр.