ХИФУ волонтердарын бырайыага бэрэсидьиэн гранын кыайда

Хотугулуу-илиҥҥи федеральнай университет «Пандемия кэмигэр доруобуйа хамаандата» бырайыага бэрэсидьиэн гранын кыайбыт. Бу туһунан университет пресс-сулууспата иһитиннэрэр.

Бырайыак COVID-19 уонна да атын ыарыылары сэрэтэр аналлаах, грант суумата — 3,5 мөлүйүөн солкуобай.

«Дьон дьиэҕэ олорон доруобуйатын көрүнэригэр, чөл олохтоох буоларыгар аналлаах бырайыак», – диэтэ волонтер, медицинскэй институт төрдүс кууруһун устудьуона Анастасия Попова. Кини этэринэн, волонтер хамсааһына олус наадалааҕын пандемия кэмигэр көрдүбүт. Бырайыак чэрчитинэн медик-волонтердары түмүөхтэрэ, үөрэтиэхтэрэ. Волонтеры-медики.рф сайт нөҥүө ким баҕарар волонетр буолуон сөп. «Сүрүнэ диэн, дьоҥҥо көмөлөһөр баҕа баар буолуохтаах, атыныгар үөрэтэбит. Манна араас эйгэттэн бааллар», – диэтэ волонтердары кытта үлэлиир киин дириэктэрэ Алена Кычкина.

Инникитин гиподинамияны (хамсаныыта суох олох) сэрэтэр куурустары былаанныыллар. Волонтердар гимнастиканы сөпкө оҥорорго үөрэтиэхтэрэ, роликтары таһаарыахтара.