ХИФУ Япония Кавасаки медицинскэй оскуолатын кытта сөбүлэһии түһэристэ

Хотугулуу-Илиҥҥи федеральнай үнүбэрсиэт Япония Кавасаки медицинскэй оскуолатын кытта бииргэ үлэлэһии туһунан сөбүлэһии баттаста. Бу туһунан ХИФУ пресс-сулууспата иһитиннэрэр.

«Билиги аан дойду үрдүнэн COVID-19 вируһу утары охсуһуу бара турар. Биһиги маннык усулуобуйаны аахсыбакка аан дойдутааҕы атастаһыыны уонна бииргэ үлэлээһини саҕалаабыппытыттан олус үөрэбин. Бү сөбүлэһии биһиги үөрэхпит кыһалара сайдыыларыгар төһүү буолуоҕа диэн бигэ эрээллээхпин. Өр сылларга доҕордоһуохпут диэн эрэнэбит», — диэн Кавасаки оскуолатын бэрэсидьиэнэ Масао Фукунага бэлиэтээтэ.

ХИФУ ректэрэ Анатолий Николаев бэлиэтииринэн, үрдүк үөрэх кыһата бэйэтин сайдыытын саҥа стратегическай былаанынан маннык хайысхаларынан үлэлэри ыытыы былааннанар — тирэхтээх экономика, олох хаачыстыбата, үчүгэй туруктаах тулалыыр эйгэ, экология этэҥҥэ буолуута, цифровой технологиялар.

«Бырагыраамаҕа сүрүн миэстэни медицинскэй хайысха ылар — Арктика уонна экстремальнай намыһах температуралар усулуобуйаларыгар киһи физиологиятын адаптационнай механизмнарын учуоттаан, эмчиттэри бэлэмнээһини кэҥэтии. 2021-2025 сылларга 2300 бырааһы бэлэмнээн таһаарыы былааннанар», – диэн ХИФУ ректэрэ эттэ.