«Химия-2020» быыстапкаҕа ХИФУ тымныыны тулуйар полимернай матырыйааллары билиһиннэрдэ

Хотугулуу-Илиҥҥи федеральнай үнүбэрсиэт Арктика уонна Хотугу сир усулуобуйатыгар механизмнар эрэһиинэлэрин халыҥатарга намыһах кыраадыска тааһырар, тымныыны тулуйар матырыйааллары билиһиннэрдэ. Бу туһунан үнүбэрсиэт пресс-сулууспата иһтиннэрэр.

Билиһиннэриини естественнэй наукалар үнүстүтүүттэрин профессора Наталия Петрова VIII Москватааҕы норуоттар икки ардыларынааҕы «Химия-2020» быыстапка чэрчитинэн тэриллибит «Арктика химията» төгүрүк остуолга ыытта.

Эксперт этэринэн, полимернай матырыйаалларга температура хамсааһына ордук буортулаах. Хотугу дойду тыйыс усулуобуйатыгар массыына уонна механизм алдьаныытын сүрүн биричиинэтэ — эрэһиинэлээх чаастар тымныыны тулуйбаттара буолар.

«Тымныыны тулуйар эрэһиинэтэ суох биир да механизм үлэлээбэт. Температура -40 кыраадыстан аллара түстэҕинэ полимер тааһырар. Эрэһиинэ алдьанымтыа буолар, халыҥатыы тимир чаастарга сыстар, механизм хамсаатаҕына хайа барар».

Эксперт бэлиэтииринэн, тымныыны тулуйуу ньымаларын туһанан лабораторияҕа оҥоһуллубут матырыйаал атын буолун сөп. ХИФУ полигоннарыгар бэрэбиэркэлээһин механизм эргэриитин уонна туттуллар кэмин быһаарарга көмөлөһөр. Икки сыллаах уопут кэннэ, эрэһиинэ матырыйаал -50 кыраадыска тымныыны тулуйбат буолуутун быһаарбыттар.

«Полимернай нанокоспозиттар технологиялара» лаборатория уонна ХИФУ Арктическай инновационнай киинин учуонайдара хас да сыл устата пропиленоксиднай каучукка олоҕуран матырыйаал оҥордулар. Наталия Петрова этэринэн, матырыйаал -74 кыраадыһы тулуйар. Матырыйаал тымныыны тулуйуута эбиллибит пластификатортан буолбакка, каучук айылҕаттан ураты хаачыстыбатыгар сытар.