«Хочу в Snow Voice» бырайыак сүүмэрдиир түһүмэҕэ

Олунньу 16 күнүгэр «Саха» национальнай көрдөрөр-иһитиннэрэр хампаанньа ханаалыгар «Хочу в Snow Voice» бырайыак сүүмэрдиир түһүмэҕэ быһа эфиргэ ыытылынна. Финал аҥарыгар уопсайа 9 уол кыттыыны ылла.

Дьүүллүүр сүбэҕэ СӨ ыччат дьыалаларыгар уонна социальнай коммуникацияларга миниистири бастакы солбуйааччыта Александр Сусоев, СӨ үтүөлээх артыыската, балетмейстер, режиссер Изабелла Егорова, эстрада судаарыстыбаннай тыйаатырын артыыһа Умсуура Ченянова, ырыаҕа дьарыктыыр педагог Степанида Лыткина уонна «Snow Voice» инники састаабын солиһа Михаил Кычкин үлэлээтилэр.

Дьүүллүүр сүбэ кыттааччылар ыллыылларын, тэҥэ муусукуҕа сөп түбэһиннэрэн хамсаналларын, көрөөччүлэри кытта хайдах үлэлииллэрин сыаналаатылар. Түмүккэ, сүбэ быһаарыытынан Андрей Сотников, Артем Шарин, Айсен Иванов, Павел Николаев, Одсэр Тангарханов, ону тэҥэ көрөөччүлэр куоластааһыннарынан Семен Нестеров кэлэр түһүмэххэ аастылар.

Олунньу 22 күнүгэр, бу алта уолтан хайалара «Snow Voice» бөлөх саҥа састаабыгар талылларын билиэхпит.