Хоккей аан дойдутааҕы чемпионатыгар Россия күрэхтэһээччилэрэ кыайыыны финнэргэ биэрдилэр

Хоккейга аан дойдутааҕы ыччат чемпионатыгар үһүс миэстэ иһин күрэхтэһиигэ, Финляндия сүүмэрдэммит хамаандата Россия хамаандатын 4:1 ахсаанынан кыайда. Бу туһунан ТАСС иһитиннэрэр.

Финляндия сүүмэрдэммит хамаандатыгар Антон Лунделл (26 уонна 59-с мүнүүтэ), Микко Петман (42), Юусо Парссинен (60) үчүгэй оонньууну көрдөрдүлэр. Россия хамаандатыттан Илья Сафонов (7) гол киллэрэн бэлиэтэннэ.

Бүтэһик икки шайбаны Финляндия хамаандатын хоккеистара аһаҕас воротаҕа киллэрдилэр. Россия хамаандата аан дойдутааҕы ыччат хамаандаларыгар үһүс миэстэ иһин бастакытын хоттордо, Финляндия хамаандата сэттис төгүлүн турнирга боруонса мэтээли ылары ситистэ.

Аан дойдутааҕы ыччат чемпионатын түмүктүүр түһүмэҕэр Канада уонна АХШ сүүмэрдэммит хамаандалара оонньуохтара. Көрсүһүү Москва бириэмэтинэн 05:00 чааска саҕаланыаҕа.