Айсен Николаев: аэропорт терминалын тупсарыы өрөмүөнүн биир сылынан бүтэриэххэ сөп

Дьокуускай аэропордун аан дойдутааҕы терминалын саҥардыы үлэтин биир сылынан түмүктээн, 2022 сылга үлэҕэ киирэрин сабаҕалыыллар. Бу туһунан ТАСС иһитиннэрэр.

«Тупсарыы үлэтэ биир сыл иһигэр оҥоһуллуо. Бырайыага быһаарыллан турар. 2022 сылга аан дойдутааҕы терминалы тупсарыы үлэтэ түмүктэниэхтээх»,-диэн Ил Дархан Айсен Николаев ааҕыныстыба суруналыыһыгар хоруйдаата.

Терминалы тупсарыы үлэтэ 2022 сылга бүтэрэр сүдү суолталааҕын, бу бириэмэҕэ аэропорт көтөр-түһэр балаһатын саҥардыы үлэтэ түмүктэниэхтээҕин туһунан өрөспүүбүлүкэ баһылыга бэлиэтээтэ. Аэропорт тупсарыллыбытын кэннэ, араас кээмэйдээх сөмөлүөттэр түһэллэрин хаачыйар кыахтаныаҕа.

«Бу кэмҥэ биһиги туристическэй күрүлгэни күүһүрдэр санаалаахпыт, ол иһигэр азия дойдуларыттан. Бырайыак ити өрүтэ биһиэхэ олус суолталаах, проектнай-сметнэй докумуоннар оҥоһуллуохтара уонна инвестордар тардыллыахтара», — диэн Айсен Николаев эттэ.

Ол курдук «Внешэкономбанк» Россия судаарыстыбаннай корпорацията инвестор буолар кыахтааҕын, ол эрээри проектнай-сметнэй докумуон оҥоһулла илигинэн сибээстээн, юридическэй сөпсөһүү суоҕун туһунан биллэрдэ.