Өлүөнэ муостатын тутуу 2025 сылга өрөспүүбүлүкэ бүддьүөтүттэн үбүлэниэн сөп

Саха сирин салалтата Өлүөнэ муостатын тутууга өрөспүүбүлүкэ бүддьүөтүттэн 120 миллиард солкуобай көрүллэрин туһунан иһитиннэрии оруна суоҕун бэлиэтээтэ. Муоста тутуутун бырайыага олоххо киирэригэр өрөспүүбүлүкэ 6,4 миллиард солкуобайы көрүөҕэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Өрөспүүбүлүкэ салалтата бырайыак олоххо киирэр усулуобуйаларын бэлэмнииргэ инники түһэрсиллибит маннык хабааннаах сөбүлэһиилэр бары өрүттэрин учуоттаата.

«Бырайыак инвестиционнай кэрдииһигэр ороскуота 83,4 миллиард солкуобайынан сыаналанар. Мантан тутуу үлэтигэр 63,9 миллиард солкуобай, 13 миллиард солкуобай нолуогар (НДС) уонна 6,3 миллиард солкуобай тутуу бастакы кэрдииһигэр бырайыак уонна смета докумуоннарын оҥорууга ороскуоттаныаҕа», — диэн этиллэр.

29,1 миллиард солкуобай чааһынай инбиэстэр үбүлээһининэн, бэдэрээлинэй бүддьүөттэн 47,9 миллиард солкуобай (75%), өрөспүүбүлүкэ бүддьүөтүттэн 6,4 миллиард солкуобай (10%) көрүллэрэ бэлиэтэнэр.

Бырайыак федеральнай хааһынаттан үбүлэнэр кээмэйэ 2021-2023 сылларга былааннанар федеральнай бүддьүөккэ көрүллүөҕэ.

2024 сылга «Куттала суох уонна хаачыстыбалаах айан суоллара» национальнай бырайыак түмүктэннэҕинэ, өрөспүүбүлүкэ суолун пуондатын гыраана муоста тутуутун өрөспүүбүлүкэттэн үбүлэнэр чааһыгар ыытыллыаҕа.

Санатан эттэххэ, 2019 сыл сэтинньи ыйыгар Өлүөнэ өрүһү туоратар муостатын тутуу бырайыагын бэрэсидьиэн Владимир Путин өйөбүлүн ылыбыта. Бырайыак муосталары тутууга уонна саҥардыыга туһаайыллар федеральнай бырагыраамаҕа киирбитэ.