Орто Халыма улууһугар оҕо искусствотын оскуолатын арыайыахтара

Олунньу 7 күнүгэр Орто Халыма оҕо искусствотын оскуолатын арыллыыта буолуоҕа. Бу туһунан култуура министиэристибэтин пресс-сулууспата иһитиннэрдэ.

Саҥа оскуоланы тутуу үлэтэ 2014 сылтан «Сахам сирэ XXI-с үйэҕэ» өрөспүүбүлүкэтээҕи үтүө дьыала хамсааһынын бырагырааматынан ыытыллыбыта. Дьиэ тутуутугар 74 мөлүйүөн солкуобай көрүллэн 752 квадратнай миэтэрэ иэннээх оскуола баар буолбута.

«Инники оҕо искусствотын оскуолатын хаарбах туруктааҕын иһин көтүрбүттэрэ. Ол кэннэ эргэ оҕо садыгар көһөрүллүбүтэ», — диэн иһитиннэриигэ этиллибит.

Бүгүн искусство оскуолатыгар 180 оҕо үөрэнэр. Кинилэр үҥкүүгэ, фортепианаҕа, байааҥҥа оонньуурга уонна уруһуйдуурга үөрэнэллэр. Оҕолору кытта тоҕус учуутал үлэлиир.

2019 сылга «Култуура» национальнай бырайыак чэрчитинэн 4,2 мөлүйүөн солкуобай көрүллэн, саҥа музыкальнай инструменнары уонна оборудованиялары атыыласпыттара.