«Саха сирин суруйааччылара» ыйынньык кинигэтэ таҕыста

Өрөспүүбүлүкэҕэ «Саха сирин суруйааччылара» саҥа ыйынньык кинигэтэ таҕыста. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Саҥа кинигэ тираһа 1000 экземпляр. Саха суруйааччыларын ассоциациятын көмөтүнэн биллиилээх библиограф Валентина Павлова оҥорон таһаарда.

Маҥнайгы кинигэ 1963 сыллаахха, ол кэннэ 2000 сылга диэри эбии түөрт ыйынньык тахсыбыта бэлиэтэнэр.

«Бу ыйынньык инники тахсыбыт кинигэлэртэн хронологиятынан балачча киэҥ. 1851 сылтан 2019 сыл иккис аҥарын саҕанааҕы матырыйааллар киирдилэр», — диэн этиллибит.

Ыйынньыкка саха, эбээн, эбэҥки, юкагир уонна нуучча литературатын 413 бэрэстэбиитэлин уонна Саха сирин уус-уран литературатын сайдыытыгар улахан үлэни ыыппыт суруйааччылар, литератураведтар, кириитиктэр, олоҥхоһуттар тустарынан матырыйаал бэчээттэннэ.