Игорь Егоров «Александр Невскэй Кубогар» иккис миэстэ буолла

Игорь Егоров Санкт-петербург куоракка Александр Невскэй 21-с Кубогар үрүҥ көмүс призер буолары ситистэ. Бу туһунан спорт маастара бэйэтин Instagram-ыгар иһитиннэрдэ.

«Кыра тиийбэтэ, ол эрэн кыттыбыппыттан олус астынным, элбэххэ үөрэнним. Күрэхтэһии тэрийээччилэригэр уонна кыттааччыларга махтал», — диэн үөрүүтүн үллэһиннэ.

Үрүҥ көмүс призер 164 очко ылан, Москва куораттан сылдьар чемпион Дмитрий Ильенкоттан икки очконан хаалла. Ленинградскай уобалас губернатора Игорь Егоровы хары чаһытынан наҕараадалаата.

Маны таһынан, саха охчуттара, спорт маастардара Николай Кобяков 154 очко ылан 10-с миэстэ, Степан Чепалов 150 очко ылан 22 миэстэ буоллулар.