Ил Дархан Харыйатыгар 700-тэн тахса үөрэнээччи кыттыыны ылыаҕа

Сыллата ыытыллар Ил Дархан Харыйатыгар кыттыыны ыла, Саха сирин араас муннуктарыттан бастыҥ үөрэнээччилэр Дьокуускай куоракка муһуннулар. Бу туһунан СӨ үөрэҕирии уонна наука министиэристибэтин пресс-сулууспата иһитиннэрэр.

Тэрээһиҥҥэ уопсайа 700-тэн тахса үөрэх туйгуннара, өрөспүүбүлүкэтээҕи, бүтүн Россиятааҕы уонна  норуоттар икки ардыларынааҕы таһымнаах олимпиадалар, куонкурустар, научнай-практическай конференциялар, спортивнай күрэхтэһиилэр кыайыылаахтара муһуннулар. Быйыл «Бэс чагда» оҕо киинигэр өрөспүүбүлүкэ 23 улууһуттан 300-тэн тахса кыттааччыны олохтуохтара.

Бары кыттааччыларга 25 тыһыынча солкуобай суумалаах Ил Дархан анал стипендията туттарыллыаҕа.

Ил Дархан Харыйата ахсынньы 23 күнүгэр Марфа уонна Сергей Расторгуевтар ааттарынан Саха сирин судаарыстыбаннай цииркэтигэр ыытыллыаҕа. Кыттааччылар араас үөрэх кыһаларыгар, киинэ тыйаатырдаргар, тыйаатырдарга, түмэллэргэ сылдьыахтара. Өрөспүүбүлүкэ биллиилээх бэлиитиктэрин, спортсменнарын уонна уопсастыбаннай диэйэтэллэрин кытта көрсүөхтэрэ.