Ил Дархан Россия регионнарын инновационнай Ассоциацияларын уопсай мунньаҕар кытынна

Ил Дархан Айсен Николаев, Гайдаровскай форум чэрчитинэн, Россия регионнарын инновационнай Ассоциацияларын уопсай мунньаҕар кытынна. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Кини мунньахха Саха сирин аатыттан кытынна. Тэрээһиҥҥэ бырабыыталыстыба бэрэссэдээтэлин солбуйааччы Марат Хуснуллин уонна РФ тутууга уонна олох-дьаһах коммунальнай хаһаайыстыбатын миниистирэ Ирек Файзуллин кыттыыны ыллылар.

Сыллата ыытыллар мунньахха сүрүн болҕомто тутуу, олох-дьаһах коммунальнай хаһаайыстыба уонна региональнай сайдыы боппуруостарыгар уурулунна.

Саха сирин баһылыга Айсен Николаев, Марат Хуснуллиҥҥа туһаайан, хаарбах дьиэ пуондатыттан көһөрүү бырагыраамата олоххо киирэр хаамыытын уонна гражданнар бырааптарыгар нормативнай-правовой уларытыылары киллэриини болҕомтоҕо ыларыгар эттэ.

Саха сиригэр хаарбах дьиэттэн көһөрүү бырагыраамата күүскэ ыытыллар. Биэс сыл иһигэр улуустарга мөлүйүөнтэн тахса квадратнай миэтэрэ иэннээх хаарбах дьиэ суох буолуоҕа, 60 тыһыынча киһи көһүөҕэ. 2020 сыл түмүгүнэн, өрөспүүбүлүкэ улуустарыгар 43 элбэх кыбартыыралаах дьиэ үлэҕэ киирдэ, 5,5 тыһыынча Саха сирин олохтооҕо олорор дьиэнэн хааччылынна.

Хаарбах дьиэлэр оннуларыгар ордук элбэх тутуу Чурапчыга, Алдаҥҥа уонна Өлүөхүмэҕэ, маны тэҥэ Дьокуускайга ыытылынна. Маны таһынан, Жатай бөһүөлэгэр хаарбах дьиэ суох буолла.

Ону тэҥэ Айсен Николаев РФ Уутун кодексыгар уларытыы киллэрэр туһааннааҕын уонна ууга барар балаһаларга хапытаалынай эбийиэктэри тутуу быраабылатын хаттаан көрөргө этии киллэрдэ.

Маны таһынан, Ассоциация бэрэстэбиитэллэрэ 2020 сыллааҕы тэрилтэ үлэтин түмүгүн билиһиннэрдилэр. COVID-19 ыарыы турар кэмигэр АИРР коронавирустан экономика өттүгэр ыарахаттары туоруурга этиилэри федеральнай бырабыыталыстыбаҕа ыытта.