Ил Дархан Саха сирин олохтоохторун сайылык күнүнэн эҕэрдэлээтэ

Сайылык күнэ православнай халандаарынан ыам ыйын 22 күнүгэр бэлиэтэнэр Ньукуолун күнүгэр түбэһэрэ бэлиэ суолталаах. Бу бырааһынньык 2018 сыл сэтинньи 6 күнүгэр төрүттэммитэ.

Билигин эмиэ сүүһүнэн сыллар анараа өттүлэригэр курдук, өрөспүүбүлүкэ тэриллиилээх уонна бааһынай хаһаайыстыбалара сүөһүлэрин илдьэ сайылыкка көһөллөр. Төрөппүттэрин кытта сайылыкка оҕо-аймах эмиэ тахсыhар. Кинилэр сүөһүнү көрөргө дьонноругар илии-атах, көмө буолан сайыҥҥы сынньалаҥнарын туһалаахтык атаараллар, үлэҕэ-хамнаска кыра эрдэхтэриттэн сысталлар, утуму салгыыллар.

«Бүгүҥҥү үөрүүлээх күҥҥэ өрөспүүбүлүкэ тыа хаһаайыстыбатын үлэһиттэригэр барыларыгар истиҥ махтал тылларын этиэхпин баҕарабын. Тыа сирин олохтоохторо уустук кэми аахсыбакка, аан дойдуну аймаабыт кутталлаах ыарыыны кытта охсуһуу үгэннээн турдаҕына салгыы үлэлии-хамсыы сылдьаллар, урукку көрдөрүүлэри куоһарарга дьулуһаллар», — диэн Ил Дархан Айсен Николаев бэйэтин эҕэрдэтигэр бэлиэтээтэ.

Тыа хаhаайыстыбатын салаата үүммүт дьылы үтүө түмүктээх көрсүбүтэ. 2019 сыл түмүгүнэн өрөспүүбүлүкэҕэ кэнники уонунан сыллар  усталарыгар сүөһү бары көрүҥэр өтөрүнэн бэлиэтэммэтэх көрдөрүү аан бастакытын ситиhилиннэ. Ол курдук өрөспүүбүлүкэ хаьаайыстыбаларыгар ынах сүөһү, сылгы, таба, сибиинньэ уонна көтөр ахсаана элбээтэ.

«Бу – инникигэ дьоһун хардыы. Сахабыт Сиригэр төһөнөн элбэх хаачыстыбалаах бэйэ бородууксуйатын оҥоробут да, соччонон ханнык баҕарар кутталтан көмүскэллээх буолабыт!», — диэн Ил Дархан түмүктээтэ.