Ил Дархан: «Саха тыла интернеккэ киирэн иһиэҕэ»

НВК САХА –Соторутааҕыта 12 томнаах «Саха тылын быһаарыылаах тылдьыта» интернеккэ киирбитэ. Бу хайысхаҕа салгыы үлэ барара былананнанар. Бу туһунан Айсен Николаев «Ил  Дарханныын кэпсэтии» биэриигэ эттэ.

«Биһиги омук буолан, салгыы сүүһүнэн сылларга барар буоллахпытына, тылбыт сайдыахтаах. Бу тылдьыт академик Петр Слепцов саҕалааһынынан, 15 сылы быһа таҥыллан оҥоһулунна. Гуманитарнай чинчийии институтун улахан үлэтин түмүгэ буолар. Онтон тылдьыт электроннай барыйаанын хайаан даҕаны оҥоруохтаах этибит. Тута оннук дьаһал биэрбитим. Алта ый иһигэр тылдьыт интернеккэ киирдэ. Билигин сыалбыт диэн, «гуглга» даҕаны, атын да систиэмэлэргэ саха тыла баар буоларын ситиһии. Билигин «гуглга» 70-ча тыл баар. Биһиги тылбыт эмиэ киириэхтээх. Ити чааһыгар үлэлиэхпит», — диэтэ кини.

«Ил Дарханныын кэпсэтии» биэриини nvk-online.ru сайтка көрүөххүтүн сөп. Айсен Николаев Саха сирэ сайдыытыгар санаатын, бэйэтин көрүүтүн, үлэтин туһунан кэпсээтэ уонна олоххо-дьаһахха, норуот инникитигэр анаарыыларын үллэһиннэ.