Ил Дархан улуустарга эпидемиологическай балаһыанньаны ураты хонтуруолга ыларга соруйда

Ил Дархан Айсен Николаев улуус баһылыктарыгар ирдэбиллэри уонна санитарнай-эпидемиологическай нуормалары тутуһуу үлэтин көҕүлүүллэригэр соруйда. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

«Миэстэтигэр нэһилиэнньэҕэ бары профилактическай миэрэни, тус харыстаныыны, уопсастыбаннай сирдэргэ тэйиччи сылдьыыны тутуһалларын туһугар үлэ ыытыллара ирдэнэр», — диэтэ Айсен Николаев.

Бары тэрилтэлэр үлэһиттэригэр термометрия ыыталлара, ОРВИ сибикилээх, температуралаах үлэһиттэри үлэҕэ таһаарбаттара, кыаллар буоллаҕына, тастан үлэ көрүҥүн салгыы тутуһаллара туһааннааҕын, ордук 65-тэн үөһээ саастаах үлэһиттэргэ сыһыаннааҕын кини бэлиэтээтэ.

«Медицинэ тэрилтэлэрэ эмтэринэн хааччыллыбыт буолуохтаахтар. Коронавирустаабыт киһини балыыһаҕа киллэрии боппуруоһа суһаллык быһаарыллыахтаах. Обсерватордары уонна эбии инфекционнай стационардары тэрийии былаана оҥоһуллуохтаах», — диэн өрөспүүбүлүкэ баһылыга бэлиэтээтэ.

Муниципальнай тэриллии баһылыктарыгар нэһилиэнньэ грипп утары быһыы ыларын ураты хонтуруолга ыларга, оскуолаларга, тэрилтэлэргэ куттала суох үөрэх, үлэ хаамыытын хааччыйарга соруйда.

Санатан эттэххэ, ааспыт сууккаҕа Саха сиригэр 79 киһи коронавирустаата.