Ил Дархан «WorldSkillsRussia – 2020» чемпионат кыайыылаахтарын эҕэрдэлээтэ

Ил Дархан Айсен Николаев «WorldSkillsRussia – 2020» VIII-с идэ маастарыстыбатын национальнай чемпионатын кыайыылаахтарыгар уонна кинилэр уһуйааччыларыгар махтал суруктары туттарда. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Чемпионат финалын кыттаачыларын кытта көрсүһүү алтынньы 2 күнүгэр дистанционнай быһыылаах ааста.

«Эһиги ситиһиигит Саха сирэ олох тэтимиттэн хаалсыбакка сайдан иһэрин туоһулуур. Биһиги аныгы кэм ирдэбиллэрэ олус суолталаахтарын өйдүүбүт, үлэ саҥа көрүҥнэрэ үөрүйэх идэлэри түргэнник туоратан иһэллэр. Онтон ханнык баҕарар дьарыкка ситиһии интеллектуальнай уонна айымньылаах сыһыанынан быһаарыллар», – диэн Айсен Николаев эттэ.

Кытааччылары индивидуальнай бэлэмнээһин көмөтүнэн уонна уһуйааччылар сыраларынан, Саха сирэ быйылгы чемпионакка 24 бириистээх миэстэни ылла уонна дойду рейтинигэр 25-с миэстэттэн тохсуска таҕыста. Ону тэҥэ финал түмүгүнэн өрөспүүбүлүкэ «Сыл прогреһа» анал аат хаһаайынынан буолла, Россия ТОП-10 бастыҥ регионнар кэккэлэригэр киирдэ.

Саха сирэ WorldSkills Russia хамсааһыҥҥа 2013 сылга кыттар, бастакы сыл өрөспүүбүлүкэ региональнай түһүмэҕэ алта компетенциянан ыытыллыбыта. 2019 сылга региональнай түһүмэх хайыы үйэ 127 компетенциянан туруорулунна.

«2019 сылга компетенциялар уонна кыттааччылар ахсааннарынан өрөспүүбүлүкэҕэ ыытыллыбыт WorldSkills саамай улахан тэрээһинэ этэ. Куонкуруска уорсайа 1036 кыттааччы уонна 800 эксперт кыттыыны ылбыта», –диэн СӨ үөрэххэ уонна наукаҕа миниистирэ Михаил Сивцев эттэ.

«Эдэр профессионаллар» WorldSkills Russia VIII-с национальнай чемпионат финала – 2020 сыл балаҕан ыйын 6-20 күннэригэр дистанционно онлайн быһыылаах ааста. Россия 83 регионуттан барыта 2800-тэн тахса киһи кыттынна. Саха сирин хамаандата 74 компетенцияҕа туруорулунна, олортон 42 кыттааччы – эдэр профессионалларга, 32 – юниордарга.