Ил Түмэн кэккэ улуустарга ыксаллаах балаһыанньаны олохтуурга этии киллэрдэ

Ил Түмэн СӨ баһылыгар Айсен Николаевка ходуһаларга уу киирэн халыҥ муус үөскээбитин иһин, кэккэ улуустарга ыксаллаах балаһыанньаны олохтуур туһунан этии киллэрдэ. Бу туһунан Ил Түмэн пресс-сулууспата иһитиннэрэр.

Ил Түмэн 10-с уочараттаах мунньаҕа саҕаланыан иннинэ, Саха сирин норуодунай дьокутаата Михаил Эверстов бу туһунан иһитиннэриилээх кытынна.

«Быйыл алтынньы ый саҥатыгар халлаан сылыйыытын түмүгэр түспүт ардах уута киирэн, ходуһалар халыҥ муус бүрүөһүннэммитэр. Бу сүөһү кыстыгар кэккэ күчүмэҕэйдэри үөскэтэр. Халыҥ хаар түспэтэҕинэ, бу кыһалҕа күүһүрүөн сөп. Ол түмүгэр сылгы уонна таба кыстыыр аһылыгын эрдэттэн эбии хааччыныы боппуруоһа үөскүүр», – диэн этиллэр.

Бэйэтин этиитигэр СӨ парламена сүөһү өлүүтэ тахсар куттала үөскээбит улуустарыгар, ыксаллаах балаһыанньаны олохтуур туһунан боппуруоһу туруорар.