Муус устар 7-8 күннэригэр Ил Түмэн XXVI-с уочараттаах пленарнай мунньаҕа ыытыллар. Пандемиянан сибээстээн депутаттар бары бииргэ олорон мунньахтаабатахтара биир сыл кэриҥэ буолла. Былырыын бүтэһигинэн муус устар 9 кунугэр XXV-с уочарата суох мунньах ыытыллыбыта. Ол кэннэ 10 пленарнай мунньах дистанционнай ньыманан ааста.
XXVI-с уочараттаах мунньахха депутаттар барыта 46 боппуроһу көрөллөр. Олортон ураты болҕомтону бүддьүөт сокуонугар киирэр уларытыы ылла. Быйыл судаарыстыба хааһынатыгар киирэр дохуот чааһа 27 миллиартан тахса солкуобайынан элбиир.
Бэҕэһээ, муус устар 7 күнүгэр Ил Дархан бигэргэтэригэр саҥа дуоһунастарга куоластааһын ыытылынна.
Бырабыытылыстыба бэрэссэдээтэлин маҥнайгы солбуйаччытынан Дмитрий Бердников кандидадууратын киллэрэр иһин куоластааһыҥҥа 39 депутат сөбүлэҥин биэрдэ, тоҕус — утарда, түөрт — туттунна.
Бырабыытылыстыба бэрэссэдээтэлин маҥнайгы солбуйаччытынан Дмитрий Садовников кандидадууратын киллэрэр иһин куоластааһыҥҥа 51 депутат сөбүлэҥин биэрдэ, биир — туттунна.
Ону сэргэ, хотугу аҕыйах ахсааннаах норуоттар бырааптарын көмүскүүр боломуочунайы Константин Роббекка биэрэр иһин куоластааһыҥҥа 51 депутат сөбүлэстэ, биир — туттунна.
Этиллибит дьон саҥа дуоһунастарыгар Айсен Николаев ыйаахха илии баттаатаҕына эрэ киирэллэр.
