Ильмень күөл тула саха буойуттарыгар ананар сүүрүү саҕаланна

Атырдьах ыйын 6 күнүгэр Новгородскай уобалас Устреке дэриэбинэтигэр Улуу Кыайыы 75 сылыгар уонна саха буойуттарын кэриэстэригэр ананар Ильмень күөл тула сүүрүү саҕаланна. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Сүүрүү тэрийээччитэ, өрөспүүбүлүкэ спордун бэтэрээнэ Дмитрий Гороховтан ураты, сүүрүүгэ Саха сирин алта олохтооҕо кыттыыны ылар. Кинилэр Аҕа дойду Улуу сэриитигэр кыттыыны ылбыт өбүгэлэрин мэтириэттэрин уонна ийэ сирдэрин буорун илдьэ тиийдилэр.

«Сэрии толоонугар олохторун олук уурбут саха буойуттарын кэриэстэригэр ыытыллар сүүрүүгэ үс кэрэ аҥар кыттыыны ылбыта кэрэхсэбиллээх. Тэрээһиҥҥэ кыттыан баҕалаах дьон элбэҕэ үөрдэр» — диэн Дмитрий Горохов эттэ.

Спортсменнар Россия биир саамай бөдөҥ күөлэ — Ильмень тула, Дьокуускай куорат Кыайыы болуоссатын мэҥэ уотуттан уматыллыбыт факелы тутан 264 килэмиэтири сүүрүөхтэрэ.

Сүүрээччилэр ахсынньы 8 күнүгэр Устреке дэриэбинэҕэ турар саха буойуттарыгар ананар пааматынньыкка фиништыыллара былааннанар.