Индигир өрүскэ хааттарбыт суудуналартан 15 киһини быыһаатылар

Абый улууһугар Индигир өрүскэ хааттарбыт суудуналартан, 15 киһини быыһаатылар. Бу туһунан СӨ быһыыр сулууспатын пресс-сулууспата иһитиннэрдэ.

«Алтынньы 21 күнүгэр суһал дьуһуурунай чааска Индигир өрүс 465 килэмиэтиригэр кыдьымах киирэн уонна өрүс уутун таһыма намыһаҕыттан, ПАО «ЛОРП» суудуналара тохтобулга турарга күһэллибиттэрин уонна экипаһы өрүһүйэргэ көрдөһөллөрүн туһунан иһитиннэрии киирбит», — диэн этиллэр.

Суудуналары Үрүҥ Хайа бөһүөлэгиттэн 138 килэмиэтирдээх сиргэ булбуттар.

Алтынньы 22 күнүгэр Орто Халыма куоратыттан Үрүҥ Хайа бөһүөлэгэр Ми-8 бөртөлүөт үс быыһааччыны илдьэ көтөн, суудуналартан чугас кытылга сөптөөх сири булан түспүт.

Быыһыыр эппэрээссийэ түмүгэр, 15 киһини Үрүҥ Хайа бөһүөлэгэр тиксэрбиттэр.