«Инникигэ хардыы — 2021»: Үүнэр көлүөнэ целевой пуондата үбүлүөйдээх наҕараадалары туттарда

Академик Владимир Петрович Ларионов аатынан «Инникигэ хардыы» эдэр чинчийээччилэр өрөспүүбүлүкэтээҕи конференцияларын пленарнай мунньаҕын кэмигэр Саха сиринээҕи Үүнэр көлүөнэ целевой пуондатын үбүлүөйдээх наҕараадаларын туттарыы үөрүүлээх тэрээһинэ буолла.

Конференция 25 сыллаах үбүлүөйүнэн: новатор-педагог, сүбэһит-педагог, сүбэһит-учуонай, эксперт-учуонай уонна бочуоттаах ааттар иҥэрилиннилэр.

««Инникигэ хардыы» бу кэм устата өрөспүүбүлүкэ нэһилиэнньэлээх пууннарын бүтүннүүтүн хабар уонна тыһыынчанан эдэр чинчийээччилэр кыахтарын арыйар маассабай хамсааһын буола үүннэ. Оҕону угуйар, үөрэтэр, кынаттыыр бу улахан сыраттан тахсар. Эһиги бары экспертэргит, тэрийээччилэргит, барыгытын идэҕитигэр бэриниилээх сыһыаҥҥыт, умсугуйуугут уонна оҕолору, ыччаттары өй-санаа өттүнэн сайыннарар интэриэскит түмэр», — диэтэ пуонда генеральнай дириэктэрэ Владимир Егоров.

Кини оҕо бары өттүнэн сайдыытыгар экосистиэмэ олохтооһун, II-с норуоттар икки ардыларынааҕы интеллектуальнай оонньууга бэлэмнээһин суолталааҕын тоһоҕолоон эттэ.

Санатан эттэххэ, өрөспүүбүлүкэ баһылыга Айсен Николаев Ил Түмэҥҥэ туһаайан этиитигэр, бу хайысхаларынан Үүнэр көлүөнэ пуондата сүрүннээн үлэлиирин бэлиэтээбитэ.

Владимир Егоров өр сыллаах сыралаах үлэлэрин иһин барыларыгар махтанна, инникитин да үүнэр көлүөнэ сайдарын туһугар бииргэ үлэлэһэр туһунан эттэ.

«Инникигэ хардыы» научнай конференция өрөспүүбүлүкэҕэ 1996 сыллаахтан ыытыллар. Сыллата тыһыынчаттан тахса үөрэнээччи чинчийэр уонна бырайыактыыр үлэтин киэҥ эйгэҕэ таһаарар.