«Искусство кино» сурунаал саҥа таһаарыыта саха киинэтигэр ананна

«Искусство кино» биллиилээх сурунаал саҥа нүөмэрэ саха киинэтин феноменыгар анаммыт. Бу туһунан сурунаал сайтыгар суруллар.

«Таһаарыы сүрүн тиэмэтэ — саха кинематографын феномена. Манна бүтэһик уон сыл устата саамай чаҕылҕай саха киинэлэрэ уонна ааттара сүүмэрдэннилэр. Ону тэҥэ саха киинэтин оҥорооччулар туһунан «төгүрүк остуол» киирдэ”, — диэн этиллэр.

Таһаарыы иккис сүрүн тиэмэтинэн документальнай киинэ буолбут, нүөмэр Дмитрий Давыдов «Песни лета» диэн саҥа киинэтин сценарийынан түмүктэнэр.

Дмитрий Давыдов «Кинотавр» Гран-при бирииһин уонна «Меридианы Тихого» киинэ бэстибээлин көрөөччү биһирэбилэ бирииһин хаһаайына. «Пугало» киинэтэ «Tromsø Internasjonale Filmfestival» ноуроттар икки ардыларынааҕы киинэ бэстибээлин «Киинэҕэ итэҕэл» бириэмийэтин ылбыта. «Ийэкээм» («Нет Бога кроме меня») киинэтэ «Окно в Европу» бэстибээлгэ талыллан киирбитэ. Саҥа киинэтин уһуллуута быйыл муус устарга түмүктэнэрэ былааннанар.