Кохлеарнай аппарааттаах оҕолор Амма өрүһүнэн устан кэллилэр

Кохлеарнай импланнаах оҕолоох уон дьиэ кэргэн, «Мин истэбин-Мин сатыыбын» диэн өрүһүнэн устууга кытынна. Бу туһунан «Харысхал» аһымал пуонда пресс-сулууспата иһитиннэрэр.

Бэрэсэдьиэн граанын пуондатын уонна «Харысхал» аһымал пуонда өйөбүллэринэн үлэлиир «Тыас-уус эйгэтигэр хардыы» куһаҕаннык истэр инбэлиит оҕолоох төрөппүттэр түмсүүлэрэ, бу дьыл от ыйын ортото «Мин истэбин-Мин сатыыбын» диэн экспедиционнай, доруобуйаны тупсарар өрүһүнэн устууну тэрийдэ. Бырайыак 2017 сыллаахтан in Yakutia туристическай оператор көмөтүнэн олоххо киирэр. Түмсүү бэрэссэдээтэлэ Юлия Устинова этэринэр, дьиэ кэргэн сынньалаҥар уунан устуу ордук барсар.

«Устуу кэмигэр оҕо ууга харбаан доруобуйатын бөҕөргөтүөн сөп. Бэлэмнэнии сыл аҥарын иннинэсаҕаланар. Сайаапка хомуйабыт, наадалаах мал испииһэгин оҥоробут. Туризм инбэлиит оҕо уопсастыбаны кытта сибээһин күүһүрдэр, дьиэ кэргэни түмэр. Кинилэр бэйэ-бэйэлэрин кытта билсэллэр, санааларын үллэстэллэр уонна кыһалҕаларын быһаарсаллар», — диэтэ Юлия Устинова.

Өрүһүнэн устуу кыттыылаахтара нэдиэлэ устата сынньаннылар, лекциялары иһиттилэр, Амма улууһун историятын уонна спортивнай оонньуулар тустарынан квест-оонньууларга кытыннылар. Түмүгэр оҕолор «Харысхал» аһымал пуондаттан өйдөбүнньүк бэлэхтэри туттулар.