Кыһыҥҥы спорт көрүҥнэринэн спартакиадаҕа бэлэмнэнии саҕаланна

Саха сиригэр кыһыҥҥы спорт көрүҥнэринэн IV өрөспүүбүлүкэтээҕи спартакиадаҕа бэлэмнэнии саҕаланна. Бу туһунан Алдан оройуонун пресс-сулууспата иһитиннэрэр.

Кыһыҥҥы оонньуулар Алдан уонна Нерюнгри куораттарга 2020 сыл кулун тутар ыйыгар ыытыллыахтара.

Спартакиада бырагырааматыгар кыһыҥҥы спорт 10 көрүҥэ киирдэ: хайыһар, биатлон, хайыһарынан спортивнай ориентирование, хоккей, шорт-трек, хайа хайыһарын спорда, сноуборд, хотугу троеборье, кыһыҥҥы многоборье уонна фигурнай хаҥкылааһын.

Тэрээһиҥҥэ бэлэмнэнии мунньаҕа алтынньы 3 күнүгэр Алдан куоракка ыытылынна. Манна биатлон көрүҥэр үгэс буолбут сааны, оҕолор туһаналларыгар анаан лазер уотунан тыгар винтовкаҕа уларытыы боппуруоһун көрдүлэр.

Кыттааччылар хамаандалара түөрт бөлөххө арахсыа диэн бэлиэтэнэр. «Сүүмэрдэммит хамаандаларга Саха сириттэн төрүттээх спортсменнар сөбүлэһии чэрчитинэн киириэхтэрин сөп, ол эрээри 10-тан элбэҕэ суох. Балаһыанньа быһыытынан, биир спортсмен иккиттэн элбэҕэ суох көрүҥҥэ кыттыан сөп», — диэн биллэрдилэр.

Мунньах кэмигэр спартакиада балаһыанньатын уонна концепциятын, ону тэҥэ Алдан оройуонугар кыһыҥҥы спорт көрүҥнэринэн кластер тэрийиитин боппуруоһун көрдүлэр.