Өймөкөөн улууһугар рудникка хайа боруодата сиҥнэн, шахтер өллө

Атырдьах ыйын 11 күнүгэр Өймөкөөн улууһугар “Сарыылаах” рудникка хайа боруодата сиҥнэн, үлэһит өллө. Бу туһунан Ыксаллаах быһыы-майгы Саха сиринээҕи управлениета иһитиннэрдэ.

“Ыраастыыр үлэ кэмигэр хайа боруота сиҥнэн түстэ. Сменаҕа 16 киһи үлэлии сылдьыбытыттан, 15 киһи бэйэлэрэ тахсыбыттар. Буор анныгар биир киһи хаалбыт”, – диэн иһитиннэриигэ этиллэр.

“Сарыылаах-Сурьма” рудник быыһыыр этэрээтин биэс исписэлииһэ быһылаан тахсыбыт сиригэр үлэлээтилэр. Буор анныттан рудник үлэһитин өлүгүн булбуттар.

Биэдэмистибэ этэринэн, бу быһылаан рудник үлэтигэр дьайбатах, онон үлэлии турар.