Өймөкөөҥҥө тохсунньуга «Тымныы полюһа» марафон ыытыллыаҕа

2020 тохсунньу 5 күнүгэр Өймөкөөҥҥө 42 килэмиэтир 195 миэтэрэ уһуҥҥа сүүрүү ыытыллыаҕа.

Тэрийээччилэр иһитиннэрэллэринэн, кыттааччылар Өймөкөөнтөн Томторго диэри тиийэллэригэр биэс чаас бэриллэр. Бу бириэмэни баттаспатах кытааччы марафонтан уһуллар.

Бу бастатан туран дьон доруобуйатыгар куттал суох буолуутун хааччыйыы ирдэбилэ. Трасса устатын тухары хас 10-с килэмиэтиргэ сылаас аһылыктаах уонна чэйдээх балааккалар туруохтара, ону тэҥэ сүүрүктэри массыыналар арыаллыахтара.

Спортсменнар марафоҥҥа көхтөөхтүк бэлэмнэнэ сылдьаллар диэн этиллэр. «Park Run» хамсааһын сорох кыттыылаахтара төгүрүк сыл устата аһаҕас халлаан анныгар сүүрэллэрэ бэлиэтэнэр. Хас нэдиэлэ ахсын Дьокуускай куорат пааркатыгар биэстии килэмиэтир уһуҥҥа түһүмэл сүүрүүгэ көхтөөх кыттыыны ылаллар.