«Күдээринэ күүрээн» диэн саҥа сериалга дьиэ кэргэн сыһыана көстөр

Саха телевидениетигэр «Күдээринэ Күүрээн» диэн саҥа сериал саҕаланна.

Сериалга дьиэ кэргэн сыһыана көстөр. Көрөөччүлэр икки тус-туспа  ыал олоҕун кэтиэхтэрэ.  Манна  дьиэ кэргэн атааннаһыыта, бэйэ-бэйэҕэ сыһыан уонна күннээҕи олох чаҕылхайдык ойууланар. 

Хартыынаны бу сайын Хатаска уонна Дьокуускайга уһуллулар. Сэтинньигэ үлэ түмүктэнэн, икки ый устата тыаһа-ууһа таҥыллан көрөөччү дьүүлүгэр тахсарга бэлэм. Режиссер Марина Платонова олоххо буолбут араас түгэни холбоон, бу элбэх сериялаах киинэ нөҥүө көрдөрөр баҕаттан сценарийын суруйбут.

Киинэ 38-тыы мүнүүтэлээх 16 сиэрийэттэн турар. Онон бэнидиэнньиктэн чэппиэргэ диэри 21.00 чаастан сахалыы сериалы көрүҥ.

«Күдээринэ күүрээн» быйылгы сезоҥҥа хайыы-үйэ үһүс сериал буолар. Ыччаты итэҕэлгэ, бэйэ-бэйэҕэ сыһыаҥҥа эрэ буолбакка, дьиҥ олоххо иитэр-үөрэтэр соруктаах.