Көҥүл тустууга Саха сирин сүүмэрдэммит хамаандата Миндиашвили Академиятын турнирыгар кыттыаҕа

Ахсынньы 25-тэн 27 күнүгэр диэри Дмитрий Миндиашвили аатынан Академия бирииһигэр 20-тэн тахса бөҕөс көҥүл тустууга Бүтүн Россиятааҕы турнирга өрөспүүбүлүкэ аатын көмүскүөҕэ. Бу туһунан «Спорт Якутии» иһитиннэрэр.

«Красноярскайга хамаанда бастыҥнара Виктор Рассадин, Дмитрий Аксенов, Айсен Потапов, Петр Константинов, Петр Павлов, Ньургун Сергин уо.д.а. кыттыахтара. Маны таһынан, турнирга Брянскайга уонна Аллараа Новгородка киирсибит бөҕөстөр кыттыыны ылыахтара. Билигин Красноярскайга баар Максим Толмачев кыттара күүтүллэр», — диэтэ сүүмэрдэммит хамаанда сүрүн тренерэ Александр Оконешников.

Красноярскайдааҕы Миндиашвили Академиятын бирииһигэр күрэхтэһии, Иван Ярыгин норуоттар икки ардыларынааҕы Гран-при турнирыгар сүүмэрдээһин быһыытынан ыытыллыаҕа. Сыл саҕаланыыта ыытыллар норуоттар икки ардыларынааҕы күрэхтэһии ыам ыйыгар көһөрүллүбүтэ бэлиэтэнэр.