Көҥүл тустууга Саха сирин сүүмэрдэммит хамаандатын саҥа хапытаанын таллылар

Көҥүл тустууга өрөспүүбүлүкэ сүүмэрдэммит хамаандатын саҥа хапытаанынан Ньургун Сергин буолла. Бу туһунан «Спорт Якутии» иһитиннэрэр.

Хамаанда чилиэттэрэ аһаҕас куоластааһынынан бары биир быһаарыыны ылыммыттара бэлиэтэнэр.

Сунтаар оскуолатын иитиллээччитэ Ньургун Сергин Миирнэй оройуонун Таас Үрэх сэлиэнньэтигэр төрөөбүт, 92 киилэҕэ диэри ыйааһыҥҥа киирсэр.

Сүүмэрдэммит хамаанда саҥа лидерэ Саха сирин уонна Уһук Илин чемпиона, ону тэҥэ бүтүн россиятааҕы, норуоттар икки ардыларынааҕы турнирдар призердара.

Бу иннинэ көҥүл тустууга Саха сирин сүүмэрдэммит хамаандатын хапытаана Арыйаан Тютрин этэ, билигин 2021 сыл саҕаланыыта гражданствота уларыйан, Белоруссия сүүмэрдэммит хамаандатын аатыттан киирсэр.

Саха сирин бөҕөстөрө Бурятия Улан Удэ куоратыгар олунньу 11-14 күннэригэр ыытыллар Уһук Илиҥҥи федеральнай уокурук чемпионатыгар кыттыыны ылыахатара.

Күрэхтэһиилэргэ Россия чемпионатыгар путевкалар оонньонуохтара.