«Көмүс күһүн» агропромышленнай быыстапкаҕа Саха сирин тэрилтэлэрэ 43 мэтээли ыллылар

Москваҕа «Көмүс күһүн» аграрнай быыстапка-дьаарбаҥкаҕа Саха сирэ 43 мэтээли ситистэ. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрдэ.

Саха сирин аграрийдара 28 кыһыл көмүс, аҕыс үрүҥ көмүс уонна боруонса мэтээллэри ыллылар. «Полюс холода» кэпэрэтиип 13 мэтээли ситистэ, олортон 11 — кыһыл көмүс уонна икки боруонса. «Чурапчы» кэпэрэтиип быйыл алта наҕараадаҕа тигистэ: биэс кыһыл көмүс уонна биир үрүҥ көмүс. «Амма» кэпэрэтиип икки кыһыл көмүс мэтээллээх, «Хаҥалас Ас» кыһыл көмүс уонна боруонса мэтээллээх, Дьокуускайдааҕы көтөр фабриката кыһыл уонна үрүҥ көмүс мэтээллэри ылла.

Сафронов аатынан тыа хаһаайыстыбатын научнай-чинчийэр үнүстүүт учуонайдара дьаарбаҥкаҕа кыһыл көмүс уонна боруонса мэтээллэри ыллылар. Боруонса мэтээли Тыа хаһаайыстыбатын аччыгый академията (ЯНИИСХ) ылла, оттон Саха государственнай тыа хаһаайыстыбатын академията кыһыл көмүс мэтээлинэн наҕараадаланна.

Уус Алдан улууһун дьаһалтата «Племенной сүөһүнү иитиигэ иһитиннэриинэн хааччыйыы» иһин кыһыл көмүс мэтээли ылла. Саха сирин ветеринариятын департамена Амма улууһун ветеринариятын салалтатын кытта улууска 2010-2018 сылларга лейкоһу сэрэтии уонна суох оҥоруу иһин үрүҥ көмүс мэтээли ылла.

Дьокуускайдааҕы килиэп кэмбинээтигэр «Туймаада остуоруйата» («Сказки Туймаады») кэмпиэт иһин боруонса мэтээли туттардылар.

Министиэристибэ дааннайдарынан, саха аграрийдара «Көмүс күһүн» бэстибээлгэ аҕыс тонна бородууксуйаны атыылаабыттар. Барыта 50-тан тахса регионтан 100-тэн тахса тыа хаһаайыстыбатын бородууксуйатын оҥорон таһаарааччылар тэрээһиҥҥэ кытыннылар. Саха сирин аатын 11 тэрилтэ көмүскээтэ.