Күүстээх тыал Миирнэйи уонна Ленскэйи уота суох хаалларда

Бэҕэһээ, атырдьах ыйын 11 күнүгэр этиҥнээх ардах уонна күүстээх тыал Миирнэйи, Ленскэйи, Бөчөнчө уонна Сүльдүкээр бөһүөлэктэрин уота суох хаалларда. Бу туһунан «Якутскэнерго» хампаанньа пресс-сулууспата иһитиннэрэр.

«Этиҥнээх ардахтан уопсайа алта 6/10 кВ кылаастаах уот ситимэ уонна 0,4 кВ күүрүүлээх 10-ча уот ситимэ эмсэҕэлээтэ», — диэн этиллэр.

Маны таһынан Сүльдүкээргэ трансформаторнай подстансияны этиҥ оҕуста.

Быһылаан содулун туоратыыга Чернышевскай бөһүөлэгиттэн эбии үлэһиттэр уонна Ленскэй оройуонуттан анал тиэхиньикэ көмөҕө кэллэ. 30 электромонтёртан турар 10 биригээдэ уонна 15 тиэхиньикэ үлэлии сылдьар. Билиҥҥи туругунан сөргүтүү үлэлэрин улахан аҥара түмүктэннэ.

«Суһал көһө сылдьар биригээдэлэр төгүрүк суукка устата күүһүрдүллүбүт састаабынан үлэлииллэр. Үлэһиттэр атырдьах ыйын 13 түүнүгэр диэри уотунан хааччыйыыны толору чөлүгэр түһэрэриигэ бары кыһамньыларын уураллар» – диэн Арҕаа электрическэй ситимнэр сүрүннүүр инженердэрэ Алексей Аникин кэпсээтэ.

Санатар буоллахха, бэҕэһээ атырдьах ыйын 12 күнүгэр күүстээх тыаллаах этиҥнээх ардах кэмигэр Миирнэйгэ дьиэлэр сарайдара уонна уот ситимнэрэ эмсэҕэлээбиттэрэ.