«Капитан Бабичев» ледокол үлэһитэ өрүскэ түһэн өллө

Ленскэйдээҕи холбоһуктаах пароходство «Капитан Бабичев» ледоколун биир үлэһитэ Дьокуускай куорат чугаһыгар Өлүөнэ өрүскэ түстэ.

«22 саастаах матрос суудуна ойоҕоһуттан охтон муус кыдьымаҕын түспүт. Сатаан быыһаабатахтар», – диэн Россия силиэстийэлиир кэмитиэтин Илиҥҥи-Сибиирдээҕи тырааныспарга салаатын пресс-сулууспата иһитиннэрэр.

Быһылаан тахсыытынан дьыала тэрилиннэ, силиэстийэ түмүгүнэн тустаах быһаарыы ылыллыаҕа.

Санатар буоллахха, бэҕэһээ, ыам ыйын 14 күнүгэр «Капитан Бабичев» ледокол Өлүөнэ өрүс 1615-с килэмиэтиригэр «Петровская курья» учаастакка муус харыытын туоратыыга ыытыллыбыта.