Капитоновка сэлиэнньэтин хочуолунайыгар саҥа котеллары туруоруохтара

2021 сылга Дьокускай чугаһыгар баар Капитонвка сэлиэнньэтин хочуолунайын котелларын уларытыахтара. Бу туһунан киин куорат дьаһалтатын пресс-сулууспата иһитиннэрэр.

Олунньу 21 күнүгэр Дьокуускай мэрин э.т. Евгений Григорьев куорат таһынааҕы ититиини хааччыйар хампаанньа хочуолунайдарын үлэтин, ону тэҥэ Киллэм, Капитоновка уонна Тулагы сэлиэнньэлэр санитарнай туруктарын бэрэбиэркэлээтэ.

Хампаанньа дириэктэрэ Сергей Андриевскай иһитиннэрбитинэн, Капитоновка 24 эбийиэгин итии уунан хааччыйар хочуолунайга анаан икки саҥа котел ылыллыбыт. Кулун тутарга олору тиэйэн аҕалыы уонна таҥыы былааннанар.

Киллэм сэлиэнньэтигэр саҥа модульнай хочуолунай тутуллара ирдэнэрин Евгений Григорьев бэлиээтээтэ.

«Билигин баар хочуолунай 20-тэн тахса сыл былааннаммыт өрөмүөнэ суох үлэлиир. Уларытыы кэнниттэн үс элбэх кыбартыыралаах дьиэни итии уунан хааччыйыы систиэмэтин сөргүтэр кыахтаныахпыт», — диэн эттэ.

Ону таһынан Тулагы сэлиэнньэтин хочуолунайын өрөмүөнэ ирдэнэрин эттэ.