Карантин сааскы каникулга дьайыа суоҕа

Дьокуускай куоракка тумуу элбээн карантин биллэриллибитэ оҕолор сааскы каникулларыгар дьайыа суоҕа. Бу туһунан куорат дьаһалтатын пресс-сулууспата иһитиннэрэр.

«Олунньу 21 күнүгэр санитарнай-противоэпидемиологическай хамыыһыйа мунньаҕар карантин уһатыллара, ол эбэтэр тохтотуллара быһаарыллыаҕа. Карантиҥҥа олорбут күннэриттэн тутулуга суох, сааскы каникул былааннаммыт эрэһииминэн барыаҕа», — диэн куорат баһылыгын социальнай боппуруоска солбуйааччыта Наталья Степанова эттэ.

Маны тэҥэ тумуулаабыт оҕо ахсаана элбэҕин туһунан бэлиэтээтэ.

«Эпидемиологическай боруок икки саастарыгар диэри оҕолорго 22,6 %-нан, үс саастарыттан алталарыгар диэри оҕолорго 57,3 %-нан, сэттэлэриттэн 14-тэригэр диэри оҕолорго 58 %-нан, 15-тэриттэн саастаах оҕолорго 39 %-нан куоһаран турар», — диэтэ кини.