Карина Чикитова туһунан киинэ тизера таҕыста

«ArtDoydu» киинэ хампаанньата «Тыыннаах хаалыы саамай дьикти остуоруйаларыттан биирдэстэрэ» («One of the most miracoulus survival stories of all time») диэн ыҥырыылаах Карина Чикитова туһунан киинэ тизерын таһаарда.

«Бу #KARINA диэн саҥа уһула сылдьар киинэбит тизер-сайаапката быйыл сайын бэлэмнэнии кэмигэр «American Film Market» тэрээһиҥҥэ анаан үбүлээһини уонна спонсордары тардар сыаллаах уһуллубута», – диэн «ArtDoydu» инстаграм аккаунугар этиллэр.

Видеоролик Уус Майа улууһун Элдьикээн бөһүөлэгэр уонна Бүлүүлүүр суолунан ааһар Кэнкэмэ үрэх кытылыгар уһуллубут.

Устар бөлөх киинэ сүрүн оруолун толорор оҕону булуохтааҕа, артыыстар боруобаларын уонна каастиннарын ыытара, сценарийы ситэрэрэ, ыт оҕолорун үөрэтэрэ күүтүллэрэ этиллэр.

Санатар буоллахха, быһылаан 2014 сыл сайын Өлүөхүмэҕэ буолбута. Кырачаан Карина тайҕаҕа соҕотоҕун ытын Найданы кытта муна сылдьан баран 12-с күнүгэр биирдэ көстүбүтэ. Кини дьикти быыһаныыта аан дойду суруналыыстарын харахтарын далыгар киирбитэ. Дьокуускай аэропордун аттыгар кырачаан кыыс дьоруойдуу быһыытын уонна тулуурун кэрэһэлиир пааматынньыгы туруорбуттара.