Кэбээйи Мастааҕын хамаандата «НВК Кубогын» хаһаайынынан буолла

«Саха» национальнай көрдөрөр-иһитиннэрэр хампаанньа өрөспүүбүлүкэ кыра нэһилиэктэрин хамаандаларын ортотугар спорт национальнай көрүҥнэригэр ыыппыт «НВК Кубога» күрэҕин кыайыылааҕынан Кэбээйи улууһун 2-с Лүүчүн нэһилиэгин Мастаах сэлиэнньэтин хамаандата буолла уонна «Дьол түһүлгэтэ» ааҕыныстыбаттан 300 000 солкуобай суумалаах сертификатынан наҕараадаланна.

«НВК Кубога» түмүктэммитинэн ис сүрэхпиттэн эҕэрдэлиибин! Биир ый кырдьык олус түргэнник ааста. Биһиги, «Саха» НКИХ сылтан сыл, сезонтан сезон, саҥаттансаҥа биэриилэри айан таһааран иһэбит. Ол курдук, быйылгы сезоммут биир ураты күрэхтэһиитинэн «НВК Кубога» буолла. Бу бырайыак өрөспүүбүлүкэбит кыра нэһилиэктэрэ түмсүүлээх буолалларыгар, күннээҕи олохторо сэргэхсийэригэр, улууска хамсааһын саҕаланарыгар уонна маассабай спорду сайыннарыыга олус көмөлөөх диэн эрэллээхпин. Эһиилги «Кубогы» өссө күүскэ, өссө үчүгэйдик тэрийэн ыытыахпыт, онон кыттыбатах улуустары, нэһилиэктэри күн бүгүҥҥэттэн бэлэмнэнэн барарга ыҥырабын», — диэн туран «Саха» НКИХ генеральнай дириэктэрэ Олег Марков кыайыылаах нэһилиэк хамаандатыгар кубогы туттарда.

Иккис миэстэни Нам улууһун 2-с Хомустаах нэһилиэгин хамаандата ылла уонна Баһылай Манчаары аатынан спорт национальнай көрүҥнэрин кииниин аатыттан спортивнай тээбириннэри ыларга 35 000 солкуобай суумалаах сертификаты тутта.

Үһүс миэстэни ылбыт Уус Алдан улууһун Баатаҕай уонна Танда нэһилиэктэрин хамаандалара бензиновай генератордарынан наҕараадаланнылар.

Ону таһынан сорох кыттааччылар «НВК Кубога» бырайыак рекордун олохтоотулар. Ол курдук, Сунтаар Хаданыттан сылдьар Павел Павлов «Кырынаастааһын» (Горностай) көрүҥү 118-та оҥордо. Оттон Кэбээйи Мастааҕыттан сылдьар Егор Саввин «Бэһирик сүүрдүү» (Катание на чурках) көрүҥҥэ эмиэ рекорд олохтоото. Кинилэргэ «Сахаада-спорт» спорт төрүт көрүҥнэригэр уонна Саха сирин норуоттарын оонньууларыгар ассоциация бэрэсидьиэнэ Александр Николаевич Ким-Кимэн анал сертификаттары туттарда.