Кирэдьиит дуогабарын усулуобуйатын уларытыыга бааннар 70 % сайаапканы бигэргэттилэр

Кирэдьииккэ иэһи реструктуризациялааһын туһунан пандемия кэмигэр өйөбүл миэрэ чэрчитинэн, өрөспүүбүлүкэ олохтоохторуттан киирбит сайабылыанньа 70 %-нын бааннар бигэргэттилэр. Бу туһунан Национальнай баан Уһук Илиннээҕи сүрүн дьаһалтата иһитиннэрэр.

«Саха сирин олохтоохторо 16 тыһыынчаттан тахса сайаапка биэрдилэр, уон тыһыынча кирэдьиит дуогабара уларыйда. Реструктуризацияламмыт кирэдьиит ссуудатын иэһин кээмэйэ 6,1 миллиард солкуобайга тэҥнэстэ. Көрүүгэ 199 сайабылыанньа киирэн сытар», — диэн иһитиннэриигэ этиллэр.

Кирэдьиит сынньалаҥа 998, ипотека сынньалаҥа 166 олохтооххо көрүлүннэ. Сайаапка 88 %-на бааннар бэйэлэрин бырагыраамаларынан реструктуризацияламмыта бэлиэтэнэр. Иэс суумата 5,3 миллиард солкуобайга тэҥнэстэ.  

«Хаачахтааһын сорох миэрэтэ уһуллубутун уонна тэрилтэлэр үлэлэрэ сөргүтүллүбүтүн үрдүнэн, кирэдьиит усулуобуйатын уларыттарыыга интэриэс баар. Атырдьах ыйын 19 күнүттэн 26 күнүгэр диэри бааннарга 308 сайаапка киирдэ, 184 кирэдьиит дуогабара уларытылынна. Реструктурированнай кирэдьиит ортотунан кээмэйэ 630 тыһыынча солкуобайга тэҥнэһэр», — диэтэ Национальнай баан Уһук Илиннээҕи сүрүн дьаһалтатын салайааччытын солбуйааччы.

Коронавирус пандемиятын усулуобуйатыгар нэһилиэнньэни өйүүр сыаллаах, кирэдьиит сынньалаҥа бырагыраама түмүктэнэн эрэрин туһунан иһитиннэрдилэр.

«Заемщик кирэдьиит дуогабарын уларытарга, эбэтэр дохуота аччаабытын туһунан докумуон биэрэргэ хойутаабыт түгэнигэр, балаҕан ыйын 30 күнүгэр диэри тиксэриэн сөп. Сиһилии Россия баанын саайтыгар уонна fincult.info сырдатар ресурсатыгар билсиэххэ сөп», — диэн иһитиннэриигэ этиллэр.