Kit Jah Матвиенко студиятыгар үөрэнэ тиийдэ

Саха сирин регги толорооччута Kit Jah дойду биллэр продюсера, композитора Игорь Матвиенко «М.А.М.А.» музыкальнай студиятыгар үөрэнэ тиийдэ.

«Миэхэ барыта саҥа буолан, олус долгутуулаах. Саха сириттэн бу студияҕа кэлбит аан бастакы үөрэнээччи буоларым быһыытынан бүтүн өрөспүүбүлүкэ аатыттан сылдьарбын өйдүүбүн. Ону кытта сахам норуотун, төрөөбүт тылбын, дойдубун аатыттан былырыын «Новая звезда» куонкуруска ситиһиилээхтик кыттыбыппынан киэн туттабын. Манна тиийбиппиттэн олус үөрэбин. Миэхэ ыалдьыбыт, өйөөбүт дьоҥҥо истиҥник махтанабын. Барыта этэҥҥэ буоллун!», — диэн ырыаһыт инстаграмыгар суруйбут.

Санатан эттэххэ, былырыын «Новая звезда» диэн бүтүн арассыыйатааҕы ырыа куонкуруһугар Kit Jah кыайыылаахтар ахсааннарыгар киирэн, Матвиенко студиятыгар үөрэнэргэ путевка туппута.