Колледжтарга уонна техникумнарга 25 тыһыынчаттан тахса сайабылыанньа киирдэ

Өрөспүүбүлүкэ колледжтара уонна техникумнара үөрэххэ туттарсааччылартан 25 405 сайабылыанньа ыллылар. Бу туһунан СӨ Үөрэҕириитин уонна наукатын министиэристибэтэ иһитиннэрэр.

Ааспыт нэдиэлэ түмүгүнэн, 9 кылаас кэнниттэн туттарсааччылартан 9 999 сайабылыанньа киирдэ, ол иһигэр бюджет — 8 678, төлөбүрдээх — 1 321. 11 кылаас кэнниттэн туттарсааччылартан 15 406 сайабылыанньа киирдэ, ол иһигэр бюджет — 13 933, төлөбүрдээх — 1 473.

Очнай үөрэхтээһиҥҥэ докумуоннары тутуу атырдьах ыйын 25 күнүнэн түмүктэнэр. Туттарсааччылартан ураты дьоҕурдарын, күүһү-уоҕу, психологическай хаачыстыбаны эрэйэр хайысхалаах очнай үөрэххэ докумуон тутуу атырдьах ыйын 15 күнүнэн бүтэр.