Конституционнай суукка төрүт тылынан үөрэнии быраабын көрдүлэр

Алтынньы 17 күнүгэр өрөспүүбүлүкэ педагогическай уопсастыбаннаһа оҕо бэйэтин төрөөбүт тылынан үөрэнэр быраабын туһунан Коституционнай суут мунньаҕар дьүүллэстэ.

Дойду регионнарыгар үөрэнээччилэр национальнай, этнокультурнай уонна да атын уратыларын учуоттаан судаарыстыбаннай үөрэҕирии ирдэбилигэр сөп түбэһэр тылынан үөрэҕи ылаллара мэктиэлэнэр. Төрөппүттэр уонна оҕо бэйэтэ үөрэниэн баҕарар тылын талар кыахтаах.

Бу сыалы тобуларга оскуолаларга эбии кылаастар уонна миэстэлэр тэриллэллэр, ол эрээри оскуола тиийбэтэ уонна каадырдар суохтара кыһалҕаны үөскэтэр.

Норуот дьокутаата Феодосия Габышева өрөспүүбүлүкэ төрүт сокуонугар ылыллыбыт ыстатыйаҕа үөрэх туһунан федеральнай сокуон быраабылатын кытта сөп түбэспэт буолуу, мунаахсыйыы боппуруостара баар диэн быһаарбыт. Итиэннэ Конституционнай суут дьүүллээн, ырытан, быһааран биэрэригэр сайабылыанньа суруйбут.

«Россияҕа судаарыстыбаннай үөрэҕирии ирдэбиллэрэ үлэлииллэр, манна олоҕуран дойду норуоттара төрүт тылларынан үөрэнэр кыахтара учуоттанар. Саха сиригэр саха уонна нуучча тылларынан үөрэнэр быраап баар. Онно сөп түбэһиннэрэн сокуон механизма көрүллэр», — диэн Конституционнай суут секретариатын салайааччыта Олег Мироновскай эттэ.

Бу дьыала түмүктүүр уурааҕа сэтинньи 13 күнүгэр биллиэҕэ.