Коркин турнирыгар 26 дойдуттан кытта кэллилэр

Бүгүҥҥүттэн уопсайа үс кун устата Дмитрий Коркин кэриэһигэр 12-н ыытыллар гран-при сериялаах күрэх саҕаланна. Көҥүл тустууга уопсайа 26 дойдуттан 150-тан тахса киһи кытта кэллэ. Саха бөҕөстөрүттэн ким финалга тахсыбыта билиннэ.

Россия спордун маастара, хас да төгүллээх призерэ, аан дойду кубогын хаһаайына Виктор Рассадин Европа үс төгүллээх чөмпүйүөнэ Турцияттан Чингизхан Эрдоганы кытта күөн көрүстэ. Бөҕөстөр 65 киилэ ыйааһыҥҥа финалга ким тахсарын быһаарыстылар.

Виктор Рассадин 14:3 ахсаанынан Турция туйгунун кыайар, өрөгөй күүрээн үрдүүр. Ол кэннэ эмиэ 65 киилэ ыйааһыҥҥа Белоруссия хамаандатыттан Ньургун Скрябин уонна Россия Бурятиятын буулаҕата Булат Ботуев тахсаллар. Финал иһин саха Ньургун бөҕөһө көрөөччүлэр өйөбүллэрин ылан эбитэ дуу, ыраас кыайыыны ситиһэр.

Маныаха быйылгы 12-с күрэх таһыма үрдээтэ диэн Дмитрий Коркин иитиллээччитэ, олимпиада призерэ Александр Иванов санаатын эттэ.

«Турнир таһыма үрдээтэ, тоҕо диэтэххэ, ааттаах-суоллаах спорстменнар кэллилэр, дойду, Европа чөмпүйүөннэрэ кэлэн туста сылдьаллар», — диио Александр.

Аан дойдуну ыллахха, Дмитрий Петрович Коркин күрэҕэр уопсайа 26 судаарыстыбаттан бааллар.

Оттон Саха сириттэн бу күрэххэ 65 бөҕөс кыттар. Сүрүннээн 57, 61, 65 уонна 70 киилэ ыйааһыҥҥа баарбыт. Олор истэриттэн 57 киилэ ыйааһыҥҥа Арыйаан Тютрин Алдар Бальжинимаевы кытта иккиэн Россия хамаандатыттан бүгүн күөн көрүстүлэр. Бүтэр уһугар дойдубут күрэҕин үс төгүллээх чөмпүйүөнэ Тютрин өрөгөйө үрдээн, финалга кинини Бурятия бөҕөһө күүтэр.

Сарсын финалга 57 кг Арыйаан Тютрин Жаргал Дамдиновы кытта күөн көрсүө, 65 кг Ньургун Скрябин уонна Виктор Рассадин утары туруохтара. Ким кыайарын сарсын финал быһаарыа.