Коронавирустаабыт ыарахан ыарыһахтарга эбии куойкалары аһыахтара

Өрөспүүбүлүкэ киинигэр коронавирустаабыт ыарахан ыарыһахтарга эбии реанимация куойкаларын аһыахтара.

Бу туһунан СӨ Доруобуйа харыстабылын миниистирэ Елена Борисова радионан быһа эпиир кэмигэр иһитиннэрдэ.

«Бүгүн биһиги коронавирустаабыт ыарахан ыарыһахтарга анаан, эбии 30 реанимация куойкаларын аһабыт. Ил Дархан Айсен Николаевтыын көрсүһүүгэ, куойка пуондатын элбэппэккэ уларытан биэрии туһунан быһаарыы ылылынна», — диэтэ кини.

Маны таһынан, өрөспүүбүлүкэ киинигэр тыһыынчаттан тахса куойка баарын туһунан эбэн эттэ.

Санатар буоллахха, өрөспүүбүлүкэҕэ ыарыһахтарга анаан 2,2 тыһыынчаттан тахса куойка тэриллибитэ.