Коронавирустан өссө икки киһи үтүөрдэ

Саха сиригэр коронавирус инфекцияттан үтүөрбүт дьон ахсаан алтаҕа тиийдэ. Икки киһи инфекционнай балыыһаттан бүгүн, муус устар 4 күнүгэр, таҕыстылар.

«Бүгүн коронавирус инфекцияттан толору үтүөрбүтүн кэннэ, Дьокуускай инфекционнай балыыһатыттан өссө икки ыарыһах таҕыста. Билиҥҥи кэмҥэ Саха сиригэр коронавирустан алта киһи толору эмтэммит. Балыыһаҕа тоҕус ыарыһах хаалла», — диэн Ил Дархан уонна бырабыыталыстыба пресс-сулууспатын иһитиннэриитигэр этиллэр.

Санатан эттэххэ, кулун тутар 31 күнүгэр бастакы үтүөрбүт киһи тахсыбыта.