Красноярскайга 2020 сыл тохсунньутугар гран-при иһин «Иван Ярыгин» турнирыгар киирсии буолуо

2020 сыл тохсунньу 23-26 күннэригэр Красноярскай куоракка көҥүл тустууга норуоттар  икки ардыларынааҕы XXXI «Иван Ярыгин» гран-при турнира ыытыллыа. Бу туһунан Красноярскай кыраай спорка министиэристибэтин пресс-сулууспата тиэрдэр.

2019 сыллаахха буолбут турнирга аан дойду 17 дойдутуттан: Белоруссияттан, Болгарияттан, Венгрияттан, Германияттан, Иорданияттан, Румынияттан, АХШ-тан, Туркменистантан, Турцияттан, Кытайтан, Казахстантан, Кубаттан, Монголияттан, Норвегияттан, Узбекистантан, Японияттан, Россияттан 188 спортсмен кыттыыны ылбыта.

«Мэтээл аахсыытыгар 36 мэтээли  ылары ситиспит Россия хамаандата инники күөҥҥэ тахсыбыта. Иккис миэстэни 15 наҕараадалаах Монголия талыллыбыт хамаандата ылбыта. Япония сүүмэрдэммит хамаандата 6 мэтээли илдьэ барбыта», диэн иһитиннэриигэ этиллэр.

Икки төгүллээх олимпиада чөмпүйүөнэ, аан дойду уонна Европа чөмпүйүөнэ, ССРС спордун үтүөлээх маастара Иван Сергеевич Ярыгин аатынан турниры 1990 сыллаахха FILA олохтообута.