Култуура деятеллэрэ дойду Төрүт сокуонуттан быһа тардыылары аахтылар

Саха сирин тыйаатырдарын уонна киинэ артыыстара дойду Төрүт сокуонуттан быһа тардыылары сахалыы уонна нууччалыы ааҕан видеоҕа уһуллулар. Бу туһунан СӨ култуураҕа министиэристибэтэ иһитиннэрэр.

Култуура деятеллэрэ Россия сурүн тутулун, ону тэҥэ киһи уонна гражданин быраабын уонна көҥүлүн акылаатынан буолар Конституция бастакы уонна иккис балаһаларын билиһиннэрдилэр.

«Хомойуох иһин, Россия бэрэсидьиэнэ уларытыылары киллэриини көҕүлүөн иннинэ, дойду гражданнарыттан баһылыыр өттө Россия Төрүт сокуонун толору ааҕа илигинэ. Оттон бу докумуоҥҥа судаарыстыбаннай салайыы систиэмэтин дьүһүннээһинтэн ураты, Конституционнай тутул, быраап уонна көҥүл сүрүн тутула бигэргэнэр» — диэн өрөспүүбүлүкэ култуураҕа уонна духуобунай сайдыыга миниистирэ Юрий Куприянов бэлиэтээтэ.

Кини этэринэн, видео-роликтарга Россия элбэх омук норуоттарын биир ньыгыл уонна тэҥ бырааптаах буолууларын туһунан санаа бэлиэтэнэр. Акцияҕа Пушкин аатынан драматичесай уонна Саха тыйаатырын артыыстара, Саха сирин үтүөлээх артыыстара, ону тэҥэ «Снайпер Саха» киинэ артыыстара кытыннылар.

Россия Төрүт сокуонугар киирэр уларытыылары талыы бүтүн Россиятааҕы куоластааһына от ыйын 1 күнүгэр ыытыллар. Саха сиригэр 800-тэн тахса куоластыыр учаастак үлэлиэҕэ. Коронавирус инфекцията тарҕаныытын сэрэтэр бары миэрэлэр тутуһуллуохтара.