Култуура тэрилтэлэрэ Россия күнүгэр ананар тэрээһиннэри бэлэмнээтилэр

Саха өрөспүүбүлүкэтин култууратын салаатын тэрилтэлэрэ бэс ыйын 12 күнүгэр 70-тан тахса Россия күнүгэр ананар бырааһынньыктааҕы тэрээһиннэри ыытыахтара. Бу туһунан СӨ култуура министиэристибэтин пресс-сулууспата иитиннэрэр.

Ол курдук, өрөспүүбүлүкэтээҕи норуот айымньытын дьиэтэ «Слава России» поэтическэй марафон бэлэмнээтэ, национальнай библиотека «Россия историята: үйэттэн үйэҕэ» викторина ыытыаҕа, Хомус түмэлэ уонна киинэ «Россия норуоттарын хомустара» быһа эфиргэ тахсыаҕа.

Саха сирин түмэлэ «Саха сирэ — Россия хотугулуу-илиҥҥи Сибиирин форпоста» виртуальнай быыстапка ыытыаҕа, «Россия — мин историям» Александр Невскай 800-с үбүлүөйүгэр анаан «Александр Невскай – Россия маҥнайгы дипломата» онлайн-экскурсияны уонна оонньууну бэлэмнээтэ.

Саха сирин филармонията «Lena river brass» духовой аркыастыр толоруутугар видео-кэнсиэр, оттон А.С. Пушкин аатынан нуучча драматическай тыйаатыра «Святитель суола» испэктээги көрдөрүөхтэрэ.